Baptaesem long Tabu Spirit- Hemi Ki long Laef
Jisas hemi Doa – Tabu Spirit hemi Ki
Fastok
Jon 1:1-14 Baebol i talem se Jisas hem i toktok from haonao God bae mekem evri samting finis.
Efesas 2:20, 1Korin 3:11 Hem i tru hem i gat gres hem i kam long wol be man oli no save hem. Hem i nambawan stamba ston blong laef. Hem i wan wei nomo bae man go long God mo kasem laef.
Jon 14:6 “Mi mi wei, mo trutok mo laef bae yu no go long Papa wan narafala wei.”
Haonao yumi kasem toktok ia mo bildim laef long hem?
Long dei blong Pentekos ol man oli gat wan kwestin oli askem Pita, “ Bambae mifala i mekem olsem wanem ?” Long wol ia sem kwestin i stap yet.
Ol Wok 2:38 Pita i talem “ Yufala i mas tanem tingting blong yufala from ol sin blong yufala mo yufala evriwan mas baptaes long nem blong Jisas Kraes God i givim Tabu Spirit ia long yufala “
Efesas 1:13 Yufala I harem trutok finis ..taem yu harem yufala i bilif long Kraes. Nao God I putum mak blong hem long yufala, se yufala i man blong hem, from we hemiI givim Tabu Spirit long yufala Yumi mas bilif long Jisas,yumi mas tanem tingting, yumi mas baptaes mo God mas givim Tabu Spirit bae putum mak long kontrak.long yumi
Long Kristen wol oli agri blong bilif long Jisas mo se evriwan mas tanem tingting. Be i gat fulap difren tingting blong baptaes mo i gat fulap difren tingting blong haonao bambae oli kasem Tabu Spirit.
Jon Baptaes
Be yumi mas save wanem baebol i talem long taem Jon i baptaes Jisas.
Matiu 3;1-17 God kalem Jon olsem ia: “ … yufala i mekemrere rod blong Hae God we i masta blong yumi. Yufala i stretem rod blong hem” Be team Jisas i kam long hem blong baptaes Jon i talem se Jisas “bambae baptaesem yufala wetem Tabu Spirit mo long faea”.
Ministri blong Jon hem olsem wan brij bitwin Ol Testeman mo Niu Testeman. Hem baptaes olgeta blong tanem tingting nomo. Hem no baptaes olgeta blong karemaot ol sin blong olgeta from Jisas i no go long kros yet blong pem praes long sin blong olgeta. Taem Jisas i kamap from i go daon ananit long wota fastaem Spirit long God i kamdaon olsem wan waet pijin antap hed blong hem mo wan voes long heven singaot: “ Hemia pikinini blong mi we mi lavem hem tumas. Mi mi glad tumas long hem “
Yumi mas save se Jon toktok long Isrel ia mekem se i toktok long fasin oli bin save. Bambae yumi mas save from wanem hem talem olgeta se Jisas bambae “baptaes wetem Tabu Spirit mo faea “
Sapos yu no kasem olsem yu no gotru doa i go long salvation.
Ministri Blong Jisas mo Wanem Hapen long Kristen Jos i Faswan.
Long Jon 3:5 Jisas i talem “ Sipos man i no bon long wota mo long Tabu Spirit, bambae hem i no save kam we God i King blong hem.” Yumi mas save wanem tufala samting ia i minim team i talem yumi mas bon bakegen.
Bon long wota i minim wanem ?
Bon long Tabu Spirit i minim wanem ?
Bon long wota i minim baptaes ananit long wota. Sam pipol ting se “bon long wota “ i minim taem yu bon long mama blong yu. Be Jisas i nogat nid blong talem Nikodimas i mas bon long mama fastaem from i happen olsem long evriwan..
Be God givim wan klia oda long olgeta evriwan yu mas baptaes ananit long wota.
Mak 16:16 “Man we i bilif long gud nius ya mo we i baptaes, God bambae i sevem hem”
Olsem wanem Bon long Tabu Spirit ?
Taem wan man i bon long Tabu Spirit Jisas i talem se tufala samting bae hapen we i olsem win.
Nambawan oli no save from weples i kam,
Nambatu oli harem noes (voes) from.
Hemi olsem taem evriwan bon long Tabu Spirit.
Long toktok ia Jisas i talem “ Man we i bilif long gud nius ia mo we i baptaes, God bambae i sevem hem…. Mo olgeta we oli bilif God bambae i givim ol saen blong paoa blong hem long olgeta ”
I gat faef saen ia long Mak 16 be i gat wan nomo i happen fastaem..
Saen ia: oli toktok long narafala lanwis.
Ol Wok 1:4-8 Jisas talem ol disaepol se taem oli kasem Tabu Spirit i taem promes blong Papa i kam finis.
Jon 16:13 Jisas i talem “ be taem Spirit ia we i Stamba blong trutok i kam hem bambae i save tijim yufala long olgeta tok we i tru.”
Ol Wok 2:1-4 Yu luksave tok ia: “ …wan noes i kamaot long skae we i olsem wan bigfala win i blu …. faea ia i seraot nao laet blong hem i kam kasem evri man … Tabu Spirit i kam fulap long olgeta nao i stat toktok long ol lanwis blong narafala man olsem we Spirit ia i givim paoa long olgeta …”
Mekem se disfala olsem wei Jisas i talem Nikodimas long Jon 3.
Oli gat win (spirit), oli gat wan samting olsem faea, mo oli gat noes (voes) i blong toktok long narafala lanwis.
Disfala samting long Ol Wok 2 ia taem Kristen jos i bon. Hem i nambawan taem se promes Jisas i mekem finis i kamtru.
Lukluk long aposel Pita naoia.
Bifo hem kasem Tabu Spirit i faenem had tumas blong bliif se Jisas hem i pikinini blong God. Be naoia hem i wan difren man. Hem i toktok strong long profesi long OL Testemen, hem i toktok long ministri blong Jisas, hem i toktok strong long Jisas sakrefaes mo taem hem kambak antap long graon bakegen.
Ol Wok 2:33-38 Pita i talem olgeta “ … ol samting ia we yufala i stap luk mo we yufala i stap harem oli wok blong Tabu Spirit ia we Jisas i givim long mifala “ Antap hem i talem olgeta “ Yufala i mas tanem tingting blong yufala from ol sin blong yufala, mo yufala evriwan i mas baptaes long nem blong Jisas Kraes blong bambae God i tekemaot ol sin blong yufala. Nao bambae God i givim Tabu Spirit ia long yufala.”
Trifala samting ia yumi mas folem mo kasem sipos yumi wantem se God bae sevem yumi.
- Yumi mas tanem tingting from ol sin.
- Yumi mas baptaes long nem blong Jisas
- Yumi mas kasem Tabu Spirit
Sam Tij blong Ol Testeman we i Soemaot Saen Olsem
Taem Jon Baptaes hem i talem olgeta se Jisas bambae baptaes wetem Tabu Spirit mo faea, Isrel oli save from histri blong hem:
Eksodas 3:1-6 Toktok ia talem hao God kalem Moses taem i stap mekem wok blong man hu lukaoutem sipsip long draeples. Moses “ …i luk we faea ia i stap laet olbaot long tri ia be i no kakae ol lif blong hem nating “. God singaot long hem “Moses Moses”
Saen ia i gat FAEA MO VOES BLONG GOD
Levitikas 9:24 Toktok ia i taem long draeples we God i givim nem blong Haos Tapolen. Bakegen God soemaot mak mo paoa blong hem from faea blong hem i kamdaon mo kakae sakrefaes.
Saen ia i gat FAEA nomo
1 King 18;38 Toktok ia i taem profet Elaeja gat rao mo faet wetem ol profet blong Baal. God givim wan ansa: “ Nao Hae God i sanem faea i kamdaon i bonem sakrefaes ya we i bon evriwan “
Saen ia i gat FAEA nomo.
2 Kronikel 7:1 God jusum Solomon bae bildim haos blong hem we i Tabu. Taem Solomon i finisim evri samting mo i stap prea finis God hem i glad blong kasem hem mo sanem faea i kamdaon. “ …wantaem nomo faea i aot long heven i kamdaon i bonem ol sakrefaes ya we oli mekem mo laet ya we i soemaot we Hae God i stap i kam fulap insaed long haos blong hem mo i saen we i saen strong tumas “
Saen ya i gat FAEA mo GOD I KAM FULAP INSAED.
Long Niu Testeman i Mekem ol Samting Olsem Finis
Jon 14:15:26 Taem Tabu Spirit i kam hem i kam wetem Pikinini mo Papa bae trifala mekem haos blong trifala insaed bodi blong wan man hu kasem. “God i kam fulap insaed “
Lukluk bakegen long Ol Wok 2:1-4 we saen from Ol Testeman i finisim evriwan taem samting olsem faea i sidaon antap long hed blong evriwan mo oli toktok long narafala lanwis.
Taem smol tri i no bonem taem Moses i luk mo harem, se i olsem taem yumi kasem Tabu Spirit. God i kam fulap insaed mo voes blong Hem i kamaot be yumi no bonem.
Mekem se i klia taem oli kasem Tabu Spirit saen ya i finisim evriwan from oli toktok long narafala lanwis.
Kwestin ya : dei blong Pentekos i wan samting i hapen wan taem nomo o hem i saen we ol Kristen sud kasem sem mak ?
Yumi mas lukluk long Ol Wok 10 mo 19.
Yumi mas save klia se taem wan man i bon bakegen long Spirit yumi harem, yumi luk i samting strong tumas. I no giaman samting i stret nomo.
Ol Wok 10 Konilias i wan gudgudfala man. Hem i prea oltaem mo wetem ol famle blong hem i stap mekem wosip long God mo i givhan long ol laen blong Isrel we oli puaman.
Be Konilias i no kasem Tabu Spirit.
Taem Pita i kam mo prij long hem oli kasem Tabu Spirit mo baptaes tu. Olgeta hu kam wetem Pita save gud se Konilias mo famle blong hem kasem Tabu Spirit from oli harem se evriwan toktok long narafala lanwis. Hemi olsem long jos blong yumi tede.
Ol Wok 11:15-18 Taem Pita i gobak long Jerusalem hem i talem ol aposel ia se: “ … i klia gud we hem i givim Tabu Spirit long ol man ya we oli no laen Isrel long sem fasin nomo we hem i givim long yumi.”
Ol aposel givim ansa : “ Samting ya i min se God i mekem rod finis blong ol man we oli no laen blong Isrel olgeta tu oli save tanem tingting blong olgeta from ol sin blong olgeta blong oli kasem laef. “
Ol Wok 19:1-6 Long Efesas i gat sam man oli bilif long Jisas be oli no save Tabu Spirit. Hem i baptaes finis (i save gat Apollos mekem baptaes ) be i baptaes long tanem tingting nomo. From oli no save hao Jisas mekem promes blong baptaes wetem Tabu Spirit Pol i baptaes olgeta bakegen mo afta hem prea wetem olgeta oli kasem Tabu Spirit mo toktok long narafala lanwis.
Mekem se God mekem sem samting olsem Pentekos.
Yumi mas kasem trifala samting sipos God bae sevem yumi. Yumi mas bilif mo tanem tingting mo baptaes mo kasem Tabu Spirit. Antap yumi mas wokbaot long gudfala fasin ya blong Tabu Spirit.
Long 1 Korin 12, 13 mo 14 Pol hem i tijim olgeta long presen blong Spirit God bae givim long memba blong jos. Hao nao ol presen ya oli mas soemaot long jos from i olsem wan bodi.
Jos ya bambae no mas mekem eni samting we i no stret o we tingting blong olgeta i miksimap. Jos mas mekem evri samting long fasin we i stret gud.
Long trifala japta ia Pol tijim we jos olsem wan bodi wea olgeta kasem Tabu Spirit finis. Hem i no tijim long fasin blong hao God bae sevem olgeta.
Be long 1 Korin 12;3 hem i talem “…man we Tabu Spirit i no stap lidim hem, hem i no save talem se Jisas i Hae god i Masta blong mi”
Mo long 1 Korin 12:13 i talem “ …Spirit ya we i wan nomo hem i joenem yumi evriwan finis long bodi ya …”
Mekem se wan man hem i no stap insaed bodi blong Kraes kasem taem i baptaes long Tabu Spirit finis.
Lukluk long Rom 10:9 wea i talem “ … sipos yu talemaot we Jisas i Hae God i Masta blong yumi o yu bilif long hat blong yu we God i mekem hem i laef bakegen God bambae i sevem yu “
Yumi mas save ia se tok blong God i tokbaot wanem yumi mas mekem bifo mo afta yumi kasem Tabu Spirit.
I no minim se i stret yu no baptaes o yu no kasem Tabu Spirit – NOGAT.
Yu wantem save hamas yumi nidim Tabu Spirit ?
Bae yu luk long Rom 8:9-15 “ …Olgeta ya we Spirit blong Kraes i no stap long olgeta oli no man blong Kraes
Rom 9:7,8 “ … Be olgeta pikinini we oli bon long promes we God i mekem olgeta ya nao oli prapa laen blong Ebraham “
Toktok ya talem tufala pikinini blong Ebreham i no olsem.
Ishmael i bon long bodi nomo be Aesak i bon long Spirit blong God i givim paoa long Ebreham olsem promes God givim long hem finis.
Sipos yumi wantem kam pikinini boe o gel blong God yumi mas bon bakegen long promes God givim finis we i kam tru long sakrefaes Jisas i mekem long kros.
Toktok blong God long Ol Testeman mo long Niu Testeman i talem klia fasin mo mak we God bae blesem mo sevem yumi.
Aesak boe blong Ebreham i bonem long merikel i kam long paoa mo spirit blong God olsem promes God mekem long Ebreham finis.
Jisas i bon long merikel i kam long paoa mo spirit blong God olsem ol profesi blong Ol Testeman.
Ol Kristen oli bon long merikel i kam long paoa mo spirit blong God olsem promes Jisas mekem finis. i stat long Pentekos fas wan.
Taem Kristen i bonem i taem i baptaes wetem Tabu Spirit mo faea long fasin Jon Baptaes talemaot long olgeta.
Jon 14 talem hao God papa mo Jisas pikinini mo Tabu Spirit trifala kam tugeta blong stap laef insaed bodi blong yumi we i olsem wan haos. Voes blong God i kamaot long narafala lanwis mo talem yes man o woman ya hem i pikinini blong mi.
Sipos yu gat eniwan hu no save wanem i mas mekem yu mas talem
Ol Wok 2:37,38. mo prea hem save mekem olsem.
JISAS HEMI DOA BLONG HAONAO GOD BAE SEVEM YUMI – TABU SPIRIT HEMI KI WE YUMI GO INSAED.
FINIS BLOMG TOKTOK
RIVIVAL FELOSIP VANUATU 2023