1: WAN DEI BLONG EVRI WIK O OLTAEM LONG LAEF BLONG YUMI?
FAS SAMTING
Long Baebol wan spesil dei i gat nem Sabat. i minim dei blong spel no dei blong go long jos.
Long Ol Testamen plante taem God hemi kros wetem Isrel from hemi no spel stret long Sabat dei.
Long Niu Testamenn ol Farisi tok agens Jisas from hem mekem sam gudfala samting blong givhan long pipol long Sabat dei.
Long team naoia yumi gat sam Kristen hu no agri sapos Sabat hemia wan spesil dei long wik o no. Antap fulap no agri sapos dei ya hemi Sarede no Sande.
Be God hemi no mekem evri samting ol miksimap mekem se yumi mas lukim long toktok blong Papa bae faenem ansa i stret.
2. TAEM SABAT I STAT FASTAEM.
BAEBOL I TALEM SE GOD MEKEM EVRI SAMTING
Ide blong wan dei blong spel hemi long stori haonao God mekem evri samting.
Taem hem finisim God hemi spel. Jenesis 2:2,3. “God hemi spel …mo i makemaot se namba seven dei blong wik i Tabu…”
Tufala samting ya hemi SPEL mo TABU
Long buk Jenesis i nogat eni moa tok blong Sabat.
Adam mo Eve hem i no holem Sabat. Tufala bae lukaotem ol hed blong kakai mo ol anomol long garen lo Eden.
Yumi save se Abraham hemi papa blong tras lo God be hemi no kipim Sabat.
TAEM ISREL PIKIMAP KAKAE LONG DRAEPLES.
Eksodas 16
God givem kakae lo ol pipol blo Isrel evri dei be lo dei namba sikis i givem dabol from dei namba seven hem dei blong spel.
Spel hem i tok impoten tumas. Pipol blong Isrel hemi folem tok blomg God long saed blong spel God o no?
TAEM GOD GIVIM TEN ODA LONG MOSES I GO LONG OL PIPOL BLO ISREL.
Eksodas 20:8-11 Oda namba 4 “Oltaem bambae yufala i mas tinghevi long Sabat dei blong holem i tabu…. Namba seven dei i Sabat dei i tabu,iI blong mi, mo yufala mas spel long hem …Team mi mekem ska emo graon mo solwota wetem olgeta samting we oli stap long olgeta mi wokem sikis dei, be long namba seven dei blong hem, mi spel …”
Mekem se God mekem Sabat wan stamba agrimen bitwin hem mo ol pipol blong Isrel.Long agrimen ya Isrel mas rememba mo tingbaot wok blong God team oli spel.
Mekem se haonao mas Isrel folem agrimen long namba seven dei.?
TOKTOK WE I SOEMAOT FASIN BLONG KIPIM SABAT
Levitikas talem fulap oda mo fasin blong hem.
Lukim Japta 16, 23, 27,28.
Hemi gat Sabat evri wik mo antap i gat spesil Sabat dei blong Spel – Pasova, Pentekos, Stretem Sin. From hem ol spesil dei blong wosip Be yumi save se namba seven dei evri wik hemi no wan spesil dei blong wosip
DUTRONOME
Long Dutronome 5;12 – 14 Moses talem Isrel bakegen haonoa oli mas mekem laef blong olgeta lo Sabat dei.
“Oltaem bambae yufala I mas tinghevi long Sabat dei, blong holem I tabu …yu mas spel long hem …yu no mas wok. Yufala wetem ol pikinini …mo ol slef…mo ol anomol…mo ol strenja …evriwan i mas spel long dei ya….”
Isrel mas rememba oli slef kasem team God karem olgeta i kamaot long kalabus lo Ejip
TOKTOK WE I KAVREMAP OL BIGFALA POEN LONG OL TESTAMEN
Long Ol Testamen taem i tokbaot Sabat dei i talem Isrel i mas holem Sabat olsem wan dei blong spel mo remeba se Papa God i gat spesil lav mo lukaotem gud ol pipol mo famle blong hem.
Hermi impoten se yumi rememba se blong Sabat God hem i no givim eni oda we Isrel mas mekem eni samting blong wosip no jos seves long disfala dei.
Oda God Givim blong Sabat.
Eksodas 31:15 Olgeta i no mas wok.
Eksodas 35:3 Olgeta no mekem faea.
Nehemaea 10:31 Olgetea no pem no salem eni kakai no samting nating.
Jeremaea 17:2 Olgeta no karem eni samting blong bae salem.
Olgeta mas kipim Sabat olsem wan dei blong spel mo olsem wan mak we God putum long Isrel. Be God no givim eni oda blong spesil wosip no jos sevis long disfala dei.
Long evri wik Sabat dei hem i wan dei blong spel mo remeba histri.
Isrel no mas kam bisi tumas wetem wok mo mekem mane se oli fogetem God papa blong olgeta. Long namba seven dei oli mas tingbaot Papa God huia mekem agrimen blong lukaotem gud long olgeta.
3. TOKTOK LONG NIU TESTAMEN WEA I TOKBAOT SABAT
LONG FO BUK BLONG GUD NIUS
Long taem Jisas wokbaot long Judia ol lida blong jos blong Isrel nem blong hem Farisi mekem Sabat dei wan dei wea loa holem taet evriwan. Be Jisas hem tu i folem ol stamba tij blong loa blong Moses.
Long fofala buk blong Gud Nius hem i tokbaot Sabat 13 taem.
Sikis taem Jisas hilim ol sikman, Fofala taem hem tij lo jos (Synagogue), Trifala taem i talem taem long wik nomo. Tufala taem nomo hem tokbaot kipim Sabat.
Jisas hem neva tijim disaepol haonao hem mas kipim Sabat from Jisas save gud se Sabat long namba seven dei evri wik kwiktaem oli finis mo sam samting difren blong God bae kam.
SABAT LONG BUK OL WOK BLONG OL APOSOL
Long Ol Wok 2 i talem se long dei blong Pentekos ol aposol mo olgeta ya we oli bilif long Jisas oli stap wanples mo oli kasem Tabu Spirit wetem saen ya oli toktok long narafala lanwis.
Afta long sem dei tri taosen man moa oli baptaes mo joen olgeta. Kristen jos i stat!
Long Ol Wok 15 i talem we ol aposol mo ol elda blong jos mekem miting blong tpkbaot hamas pipol hu joenem jos be we oli no laen blong Isrel mas folem loa blong Moses.
Long vas 29 I talem fo samting nomo:
Hem no mas kakae we man usum blong mekem wosip long narafala god,
Hem no mas kakae blad,
Hem no mas kakae anomol we man i jokem nek blong hem nomo, Hem no mas mekem nogud wetem woman.
Sapos oli folem ol rul ya yufala i go long stret rod.
HEM NO TOKBAOT SABAT NATING.
SABAT LONG OL LETA I GO LONG OL JOS LONG DIFREN PLES.
Ol leta i go long ol jos i stap long difren ples i talem ol stamba blong tij mo long fasin blong laef we pipol mas folem bae livim laef we Papa God hemi hapi tumas from.
Be ol leta ya i no talem se oli mas kipim Sabat olsem loa blong Moses.
Kolosi 2;14-17 talem se long kros Jisas ravemaot ol rul blong Loa. Mekem se yu no letem man i putum rul long yufala se yu no letem wan man i talem long yufala i mas mekem wan dei ya i tabu no yufala i mekem Sabat dei i olsem I olsem.
Sabat dei i dei blong spel oltaem oltaem o no?
No! Jon 20:17.
Taem Jisas i kamaot long gref mo hem gobak long God hemi Hae Pris huia pem praes olsem Dei Blong Stretem Sin blong ol man finis.
HAONAO YUMI STANAP STRET LONG FAMLE BLONG GOD?
Niu Testamen hemi wan niu agrimen God mekem wetem man bambae man gat rod blong stap oltaem tugeta wetem hem.
Bifo loa blong Moses i kam God mekem agrimen wetem Ebraham wea hem gat tras mo bilif lo God. Agrimen i nogat loa i stamba blong hem.
Galesia 3:23-25 talem hao taem blong fasin blong bilif i kamtru finis.
Bifo ya taem we fasin blong bilif ya i no kamtru yet, Loa ya i stap holem mifala evriwan olsem we mifala kalabus finis …… Loa ya i stap mekem long mifala olsem kam kasem taem we Kraes i kamtru .… +Naoia we taem blong fasin blong bilifi kamtru finis mifala i no moa stap ananit long Loa ya.
WANEM PLES BLONG SPEL WE I TALEM LONG LETA WE I GO LONG OL LAEN BLONG ISREL (HIBRUS)
Hibrus 4:9,10,11. Taem God i finisim evri samting hem spel. Naoia yumi kasem olsem we yumi spel oltaem long wok blong yumi. Sapos yumi no bilif, bambae yumi olsem laen blong Isrel fastaem hem no go insaed graon God mekem promes blong givim long olgeta.
HAONAO BAE YUMI FAENEM DISFALA KAEN SPEL?
Aesea 28:11,12. “Hae God i yusum ol man blong narafala kantri blong tijim yufala, we lanwis blong olgeta i narafala olgeta. Hem i wantem givim spel long yufala evriwan mo i wantem mekem yufala i harem gud bakegen…”
Long Ol Wok 10 i talem wetaem aposol Pita toktok long wan man Konilias mo ol famle blong hem long saed blong Jisas. Olgeta ya kasem Tabu Spirit mo oli baptaes ananit long wota. Olgeta kasem laef Hem kasem samting nating blong Sabat. Hem kasem spel oltaem.
Long Ol Wok19 i talem wetaem aposol Pol go long Efesas we hem i faenem sam man blong Jisas. Be olgeta ya i baptaes olsem we Jon i mekem. Pol i talem oli mas baptaes bakegen long nem blong Jisas. Nao taem ol man harem oli baptaes. Taem Pol putum han long hed blong olgeta oli kasem Tabu Spirit mo toktok long narafala lanwis. Man ya oli twelef olgeta.
Hem kasem samting nating blong Sabat. Hem kasem spel oltaem.
SABAT HEMI LONG WANEM DEI EVRI WIK?
Hemi no long wan spesil dei. Hemi no Sarede no Sande.
Long Niu Testamen tij Sabat hemi dei blong spel EVRI DEI.
Talem bakegen se Sabat blong Ol Testamen hemi i wan mak
nomo we Jisas i mekem blong evri dei finis.
Spesil Sabat dei blong Lafet i tokbaot long Levitikas 23 hem tu hem mak nomo blong dei bae kam long Jisas.
Lafet Blong Pasova i tokbaot Kraes hem pembak numi long sin.
Lafet Blong Tekemaot Kakae long Garen hem tokbaot Kraes hem kamaot long gref.
Antap hem Lafet blong Pentekos tu from i soemaot taem Kristen jos i bon 50 dei afta Jisas hem kamaot long gref.
Dei Blong Stretem Sin hem wan dei we i soemaot mak kasem taem Jisas hem Las Hae Pris hem go long God.
Mi talem bakegen blong Kolosi 2:16,17 “ . yufala i no letem man i talem long yufala, se yufalai i mas mekem dei ya tabu …no yufala i mas mekem Sabat dei i olsem … ol loa oli olsem sado nomo be samting we i no kamtru yet. Be prapawan blong hem, ol samting we i stap long Kraes”.
LASTOK
Long taem blong Ol Testamen God givim Sabat dei we hem wan mak I talem oli famle blong God. God talem finis hem no mas wok long namba seven dei. But Isrel mekem fulap samting I rabis fasin long ae blong God. God sanem Jisas pem praes blong ol sin blong evriwan bae givim janis oli kam long hem.
Naoia Jisas invitem evriwan
.
Matiu 11:28-30
Mo Jisas i talem se, “Yufala evriwan we i stap had wok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya me mekem we yufala i spel gud.
Yufala i mas putum yok blong mi long solda blong yufala blong yufala i wok wetem mi from we mi mi wam kwaet man mo tingting blong mi i stap daon. Mo yufala i mas lan long mi nao bambae yufala i faenem pis long laef blong yufala.
YufalaiI mas mekem olsem from we wok ya we mi bambae mi putum long yufala wok blong hem i isi nomo mo ol samting we bambae mi givim long yufalablong yufala i karem oli no hevi,”
Ananit long Niu Agrimen (Niu Testamen) Sabat hem i no wan spesil dei. Hemi spel long Tabu Spirit we i kam tru Jisas Kraes huia karem sin blong olgeta mekem se yumi stap long ples blong spel oltaem.
FINIS BLONG TOKTOK.
RIVIVAL FELOSIP VANUATU 2023